Ætli þessi þjónusta fyrirfinnist í Hamingjulandinu?

Ég stóð við afgreiðslukassann í litlu Billa versluninni minni sem er lítil kjörbúð hér í nágrenninu.  Tíndi upp úr körfunni ýmsan varning og setti á færibandið.  Vegna þess að ég var á hraðferð hafði ég keypt innpakkað grænmeti en ekki valið sjálf úr körfunum sem ég geri nú alla jafna.

Brosandi afgreiðslukonan handlék pakka með átta tómötum og segir síðan við mig:

Það er einn tómatur ofþroskaður í þessum pakka.

Ó er það segi ég, og ætlaði bara að láta það eiga sig, nennti ekki að fara inn í búðina aftur og skipta.

Hún grípur til kallkerfisins og kallar í aðstoðarmann, hann kemur að vörmu spori, brosandi tekur hann við tómötunum og skiptir út pakkanum fyrir nýjan með ferskum fínum tómötum.

Á meðan á þessu veseni stóð lengdist röðin við kassann, allir biðu bara í rólegheitum og röbbuðu saman eins og ævagamlir vinir.

Er þetta bara ekki frábær þjónusta?  Datt í hug að segja þessa sögu eftir að hafa lesið bloggið hennar Helgu bloggvinkonu þar sem hún lýsir Bónusferð sinni þar sem hún varð að henda helmingnum af grænmetinu og ávöxtunum í ruslið þegar heim kom vegna þess að það var óætt.

 

Athugasemdir

[Jenný Anna Baldursdóttir, 14.4.2008 kl. 10:55]

Svona á þetta að vera.

Annars kaupi ég aldrei ferskt grænmeti í Bónus, og ekki kjöt eða fisk.  Fer í Hagkaup til þess.  Grænmetið er tæpast ætt og þar er sparnaðurinn farinn fyrir lítið.  Ég vil hafa grænmetið mitt brakandi ferskt og fallegt, ekki dáið á fimmta degi.

[Guðrún Emilía Guðnadóttir, 14.4.2008 kl. 11:36]

Þið ættuð nú bara að vita hvað þeir bjóða manni upp á hér á Húsavík,
Það er nú bara viðbjóður, það hellst allavega ekki ferskt í 5 daga,
nema það sem er ræktað á Hveravöllum sem er gróðurhús hér rétt hjá.

Allir stóðu bara og töluðu saman segir þú Ía mín, meðan maðurinn fór að ná í nýja tómata, það mundi ekki gerast hér, hvorki að þér væri bent á að eitthvað væri að vörunni, eða að samskiptin væru á skemmtilegu nótunum við kassann,
fólk frekar ýtir á mann en hitt.
Ég kaupi oft grænmeti í Bónus, en maður þarf að vanda sig.
                                 Knús kveðjur.
                                    Milla.

[Eva Benjamínsdóttir, 14.4.2008 kl. 15:18]

Sæl Ía mín, mikið ertu heppin að þurfa ekki að standa hér í stressröð sem engin yrðir á mann í. Auðvitað ætti það að vera partur af programmed að heilsa upp á náungann, glaður í bragði og tala í það minnsta um góða veðrið , góðan daginn

Ég var að koma úr Bónus í Mosfellsbæ.  Sammála Jenný og ég segi, því miður grænmetið er alltof oft óboðlegt. En Lambhaga salatið í nýlegu plastkössunum fyrirferðamiklu, er gott og geymist miklu betur en salatið í plastpokunum. En appelsínurnar eru undantekningalítið óætar. Svo er þeim fátækustu boðið að kaupa þrjár marðar zukini og fjórar myglaðar paprikur á 50 kall hvorn pakka. Allt er til sölu og mér bíður við að þurfa að fara í gegnum þetta. Annars er oftast 3 af 4 tómötum í pakkningu heilir, en þú verður að nota þá strax í dag.

Mjölmeti, mjólkurvörur og ostur er ódýrastur þarna. Æ, og þarna fauk 5000 kall.

Það er gaman að koma í Kolaportið um helgar og fá nýjar kartöflur og hunangslegin lax á rjúkandi nýjar fjallagrasa flatkökur, rúgbrauð, hákarl, harðfisk og svo ég tali nú ekki um mannlífið. Þetta er eini staðurinn á Íslandi sem minnir mig á útlönd. Það vantar tilfinnanlega stóran ávexta og grænmetismarkað hér í borg. Það þarf líka að kenna íslendingum að borða meira grænmeti og salatkál.

kveðja eva

[Þröstur Unnar, 14.4.2008 kl. 18:17]

Jebb, það vita nú allir að grænmeti fæst ekki í bónus, það er orðið brúnt og heitir brúnmeti þar.

En nákvæmlega þessi þjónusta sem þú nefnir þarna, er einmitt við lýði hér á Skaga vorum í henni Einarsbúð, verslun sem hefur staðið af sér Krónuna, Bónus, Nettó og hvað þetta allt saman heitir nú. Þetta er ekki ódýrasta búðin í bænum, en með frábærri þjónustu og gæða vörum haggast Einarsbúð ekki þrátt fyrir risana, sem eru að sögn sumra farnir að huga að samdrætti hér.

Kveðja til Parg.

[Ía Jóhannsdóttir, 14.4.2008 kl. 20:02]

Takk fyrir öll innlitin í dag.  Hugsið ykkur aðeins einn vinur sem kemur með eitthvað jákvætt og það kemur ofan af Skaga auðvitað, soddan eðal fólk sem þar býr.