Ætti ég að þora?

Ég nenni nú ekki alltaf að fylgja mínum elskulega á hans ferðalögum en vegna eindregnar óskar, og yfirlýsingar hans um ágæti minnar nærveru og hvað ég er skemmtilegur ferðafélagi, ætla ég að láta það eftir honum í þetta sinn. 

Langar bílferðir með mínum eru nú ekki það sem ég vildi kjósa sem dægrastyttingu.  Hann er einn af þeim sem er kominn á leiðarenda löngu áður en ferðin er hafin.  Svona aðeins á undan sjálfum sér.  Þ.a.l. sér maður nú asskotakornið lítið af fegurð fjalla og dala, þar sem brunað er á hraðbrautinni og varla að maður fái pissupásu. 

 Viðkvæðið er oft:  Er ekki bara allt í lagi að stoppa næst?  50 km í næstu resteríu og ég í spreng. 

Ég alltaf svo samvinnuþýð eða þannig:  Ha jú, jú ekkert mál. 

Ferðinni er sem sagt heitið til Hamborgar þar sem minn ætlar að mæta á þriggja daga fund.  Kemur síðan bara í ljós hvað ég dunda mér við á meðan.  Hef nú ekki komið til Hamborgar í mörg ár svo þetta getur orðið spennandi reisa, kannski ætti ég að líta á portkonurnar í Herbertstrasse (heitir hún ekki það fræga gatan) og sjá hvort þær hreyta í mig ónotum eins og seinast þegar við fórum þar um, en þá var ég nú í fylgd með mínum svo ekki skrítið að þær hræktu að mér, fávísri konunni með myndalega manninum.   Spurning um hvort ég þori að taka áhættuna.

Svo nú er að henda ofan í töskur og bara drífa sig á vit ævintýra næstu daga.  

 

 

  

Athugasemdir

[Kristín Gunnarsdóttir, 6.6.2008 kl. 07:42]

Góðan Daginn Ía mín, altaf gaman að fara til Hamborgar, njóttu þín í þessa daga.

Knus til þín

[Jenný Anna Baldursdóttir, 6.6.2008 kl. 08:28]

Skemmtu þér vel Ía mín og kíktu í búðir.  Margar búðir.

[Ía Jóhannsdóttir, 6.6.2008 kl. 09:58]

´Jæja þá er maður klár, búin að setja upp kappakstursgleraugun og alles.

Hallgerður ég verð að treysta Önnu konu Halldórs fyrir honum þessa daga, heldur þú að það verði ekki í lagi ?

Jenný, já mig vantar alveg nauðsynlega svona skó þú veist.... ætla að kíkja aðeins

Hafið það gott elskurnar í allan dag.