Hraunmolarnir okkar voru festir á þröskuldsbút.

Mikið hefði verið gaman að standa í sporum forseta Alþingis og taka í hlýja hönd friðarleiðtogans frá Tíbet. 

Hraunmolinn sem Dalai Lama var færður vakti athygli mína enda minnti mig óneitanlega á grip sem við hjónin hönnuðum fyrir all mörgum árum hér í Tékklandi. 

Þannig var að árið 1994 að ég held, ákvað ég að taka þátt í alþjóðlegum jólabazar hjá International Womens Club. Þar sem ég var ein frá Íslandi og varð að koma með eitthvað þjóðlegt á söluborðið ákvað ég þegar ég fór heim um sumarið að fylla nokkra poka með hraunmolum og flytja með mér út. 

Þá er það sem sé upplýst hér að ég stal hrauni og flutti með mér úr landi.  

Þegar heim kom var hafist handa við að hanna mynjagrip frá Íslandi.  Minn elskulegi kom með þá hugmynd að festa hraunmola á viðarkubb og þar sem við vildum halda verðinu í hófi keyptum við nokkra þröskulda, söguðum í búta og lökkuðum svarta.  Hraunmolanum var síðan komið fyrir með skrúfu minnir mig frekar en nagla ofan á bútnum og til að gera þetta seljanlegra létum við útbúa skildi sem á stóð GREETING FROM ICELAND  sem var síðan komið snyrtilega fyrir á hlið þröskuldsins.

Þetta auðvitað rann út á jólabazarnum ásamt íslensku síldinni sem ég nota bene stal ekki og ég safnaði vel í sjóð sem rann til fátækra barna.  

Nú er sem sagt einhver listamaður búinn að stela hugmyndinni okkar og farinn að stórgræða, shit svona missir maður hvert tækifærið á eftir öðru út úr höndunum bara fyrir eintóman klaufaskap. 

Man hvað mér fannst hugmyndin frábær á sínum tíma en var auðvitað búin að steingleyma henni þar til ég sá þetta ferlíki sem blessaður maðurinn fékk í dag afhent með viðhöfn.

Verð að segja það að mér fannst okkar útgáfa fallegri, eitthvað svona nettari. 

Hvernig ætli það sé núna með hraunið fylgir vottorð eins og með kjötinu?

Nei segi bara svona og svo var ég að velta öðru fyrir mér líka ætli hann verði látinn borga yfirvikt?    

Dalai Lama í Alþingishúsinu

Athugasemdir

[Hrönn Sigurðardóttir, 2.6.2009 kl. 21:28]

Hann er svo mikið krútt þessi kall.

[Ásdís Sigurðardóttir, 2.6.2009 kl. 21:59]

Þú hefðir átt að fá þér einkaleyfi, annars finnst mér gjafir ekkert þurfa að vera stórar, lítill hlutur gleður jafn mikið eins og þú bendir á.  Krúttkveðja

[Anna Sig (IP-tala skráð) 2.6.2009 kl. 23:47]

Kæra Ía - þakka skemmtilegan pistil - mér lýst enn betur á HRAUN-þröskuldinn þinn með "GREETING FROM ICELAND" nú ætti Dalai að renna við í sveitinni þinni og ná í alvöru/original minjagrip..... alltaf gaman að kíkja hér við. Gangi þér áfram vel í tilverunni. Ég hitti Ástu vinkonu þína í sl viku, hún er alltaf jafn falleg og ljúf. Þið eruð svo likar........vinkonurnar.

Kær kveðja Anna Sig.

[Ragna Birgisdóttir (IP-tala skráð) 3.6.2009 kl. 09:12]

[Jenný Anna Baldursdóttir, 3.6.2009 kl. 11:42]

Alltaf brautryðjandi Ía mín.

[Guðrún Emilía Guðnadóttir, 3.6.2009 kl. 19:10]

Guð má maður ekki taka hraun, eða bara ekki flytja það úr landi?
Gísli minn var nefnilega að taka hraunmola fyrir min í smá beð sem ég er með, eða sko hann hugsar um það, en ég skipa fyrir.
Annars ert þú flottust Ía mín.
Milla