Eru þið alveg að missa það þarna uppi á ísaköldu landi!

Vá bara það að detta niður á hugmyndina er eitt og sér túskildings virði en það að framkvæma þennan gjörning hlýtur að hafa kostað blood, sweat and tears.  Hugsið ykkur úthaldið hjá listamanninum.  Að standa í þessu í öllum veðrum (geri sterklega ráð fyrir að þetta hafi verið framið á Íslandi)  berjast á móti storminum í grenjandi rigningu bara til þess eins að bera grjót í haug, já og gangsstéttahellur eða eru þetta ekki hellur þarna efst?

Mér finnst hann alveg hafa átt skilið að fá annan túskilding fyrir það að hálf drepa sig á þessum burði en að kaupa  ljósmynd af fyrirbærinu fyrir 10 millur, Já sæll, er ekki alveg allt í lagi þarna heima!!!!

Láttu nú ekki svona Ía mín segja sumir núna, þetta er list! 

Sér er nú hver helvítis listin urra ég bara á móti!

  Alveg skítsama hvað ykkur finnst, þið megið kalla þetta list ég hef bara ekki geð í mér að meðtaka þetta núna. 

Á meðan leikskólagjöld hækka, bensín, olía, sígó og bjór sko ég meina allt þetta allra nauðsynlegasta sem almenningur þarf á að halda til að geta lifað þarna uppi á klakanum þá er verið að kaupa ljósmynd af gjörning! 

Ástæðan jú okkur vantaði svona í safnið!  Áttum enga svona mynd fyrir!  

Segið mér hver hefur gaman af því að skoða svona myndir og hvar í ósköpunum á hún svo að hanga?   Spyrjið eftir henni aftur eftir u.þ.b. hálft ár, þá verður svarið:  ,,Ha jú ég man eftir henni ætli henni hafi ekki verið komið fyrir hér niðri í geymslu". 

Og þar kemur hún til með að liggja um ókomin ár! 

Hér urra ég á eftir efninu!  Djöf..... það sem veröldin er klikkuð á köflum! 

 

Dýrasta verkið

Verið bara smart casual og byrjið að vinna!!!!!!!!!!

Jahá maður bara krullast allur upp eftir að lesa nýjustu fréttir frá hinu stóra Alþingi.

Þar sem þingheimur sat á skólabekk í dag og kynntust reglum pródakolsins vona ég að allir þeir nýliðar sem sátu þarna,  eru það ekki yfir tuttugu manns, hafi tekið vel eftir. Þetta er auðvitað alveg nauðsynlegt í byrjun þings að kynna lög og reglur Pródakols og fara eftir þeim líka.

Sko nú tala ég grínlaust og af reynslu.

Með hálstau eður ei, elskurnar mínar okkur gæti ekki verið meir sama það eina sem við biðjum um er að þið byrjið að VINNA!  Og verið bara snyrtilega til fara og farið í sturtu áður en þið mætið í vinnuna svo þið lyktið ekki af erfiði gærdagsins.

Bendi ykkur á að það er líka til eitt outfit sem heitir Smart Casual.

Annars hafa fréttir frá okkar nýja Alþingi aðeins truflað mig.  Skal viðurkenna að ég hef nú ekki lesið allar frá a til z en sá í morgun hvað Jóhanna okkar stóð með sínu fólki í norðangarra og barðist gegn vindinum, var ekki fyrirsögnin einhvernvegin þannig.

Fyrirgefið hvern andsk......var hún að þvælast norður og halda fyrsta þingfund á Akureyri?  Var verið að mála þingsali? Veit að það var verið að skipta um einhverja rúðu sem tók óratíma að panta, Yeh right!  

 Og ég segi nú bara eins og hún tengdamóðir mín sagði oft: Ja hérna, og eitthvað hefur það kostað!!!!!    Ekki málningin eða rúðan heldur ferðir fyrir hersinguna norður í garrann.

Æ mér r svo sem alveg sama svo framalega sem þau hafa verið að vinna en ekki verið í einhverri sportreisu!

Svo ég haldi aðeins áfram þá setti að mér svona kjánahroll þar sem ég horfði á viðtal við einhverja Guðfríði Lilju þingkonu, held hún sé frá VG, þar sem hún sagði að þingmenn hefðu verið að læra margt gagnlegt í dag þ.á.m. að klæðast FÍNUM FÖTUM.  JÁ SÆLL!!!!!!   Fínum fötum. Hehehehe...

Elskurnar minar komið bara fram eins og ykkur líður best en snyrtileg svo bara þannig að þið verðið okkur ekki til háborinnar skammar en landi og þjóð til sóma. 

Berið virðingu fyrir embætti ykkar og stöðu, það er það eina sem við biðjum um með eða án hálstaus.

Og bara svona til að þið krullist öll aðeins upp og fáið smá fiðring í mjóhrygginn þá finnst mér alltaf karlmenn frekar sexy með Breskan Lord klút um hálsinn. Eitthvað svo traustvekjandi. 

Einhver hvíslaði því að mér um daginn að þetta væri að verða inn aftur. 

Og aldrei lýgur almannarómur! 

 

 

 

Þingmenn læra góða siði

Æ, æ nú verður blaðamaður að vanda sig betur.

Ef dæma má af fyrirsögninni þá eru tré komin á harðahlaup frá Fælledparken eftir blásaklausum borgarbúum til þess eins að koma þeim  fyrir kattarnef.  Síðan veit ég ekki hvort umrætt tré var sagað í búta og liggur eins og hráviður um eitthvert Allé eða hvort það voru mörg tré sem voru felld.

Þessi er líka rosa góð:  Lögreglan fólk danska heimavarnaliðið til þess að loka garðinum.  OK, ef þetta á að vera að heimavarnaliðinu hefði verið falið að loka garðinum sem ég held að sé nokkuð rétt þá er það alveg hrikalega fyndið að það þurfi heilt varnalið til þess að loka smá grasgarði í Köben. 

Síðan eru tré að velta um koll þarna líka ef trúa má fréttinni. Mér finnst nú eiginlega betra að segja að tré rifni upp með rótum heldur en þau geti oltið. Ja jú auðvitað geta þau oltið ef þau eru ekki rótfest.

Iss annars verður okkur öllum á í messunni en þetta var bara svo hrikalega áberandi ruglað og gert í fljótfærni. 

 

 

Tré varð manni að bana

Ef þú getur miðlað fróðleik til annarra er þá ekki rétt að gera svo.

Ég er búin að velta þessu lengi fyrir mér og lofaði að ég skildi opna allar gáttir einn daginn.

 Reiðin sem er búin að búa innra með mér í nokkurn tíma hefur lægt. Ég get núna talað um þessi mál án þess að fyllast þessari óstjórnlegu reiði í garð Íslenska heilbrigðiskerfisins og tími kominn til að gefa af sjálfri mér öðrum til varnaðar, alla vega umhugsunar.

Góð vinkona mín hér í Prag heimsótti ,, Dr. House"  fyrir nokkru síðan en hann er okkar sameiginlegi læknir og það er honum að þakka að ég sit hér núna og skrifa þetta hér inn.  Dr. House sagði við vinkonu mína:  Mikið vildi ég að hún vinkona þín hefði komið til mín þremur mánuðum fyrr.

Það er nefnilega það. Þremur mánuðum áður en ég fór til Dr House sat ég heima á Íslandi,    bæði hjá Krabbameinsfélaginu og Hjartavernd og kvartaði yfir verkjum í brjóstholi, þyngdartapi og energileysi.  Enginn hlustaði á mig, á hvorugum staðnum.  Hjá Krabbameinsfélaginu sat læknirinn fyrir framan mig og tók þessa venjulegu stroku og bæ búið.  Frétti seinna að það er víst ekki þeirra deild að ath. neitt annað en brjóstin og leghálsinn, hitt skiptir víst engu nema þú sér í einhvers konar úrtaki.  Sem sagt ,,spes" meðferð er ekki í dæminu jafnvel þó þú kvartir yfir einhverju sem hefði átt að ath. ekki seinna en þarna á staðnum.

Sama sagan var hjá Hjartavernd.  Læknirinn þar hafði miklu meiri áhuga á Prag heldur en mér sem sat þarna og kvartaði.  Hann hlustaði mig ekki einu sinni því ef hann hefði gert það hefði hann átt að heyra í ,,græna karlinum"  og það vel. Það eina sem hann sagði var þú ættir að láta athuga þetta ef þetta lagast ekki!!!!!!!!!!!!!!!!!!   Halló, ég var með 10 x 7 cm mein í lunga plús........

Þið sem hafið fylgst með blogginu mínu munið e.t.v. eftir því að ég bloggaði um þetta hér 20. sept. eða rétt eftir að ég kom heim. Set hér inn link fyrir þá sem ekki hafa lesið áður:

http://iaprag.blog.is/iaprag/entry/718779

 

Ekki er það svo að við séum að níðast á helbrigðiskerfinu heima.  Við borgum fullt gjald fyrir þá þjónustu sem við biðjum um og ég held að ég hafi pungað út nokkrum tugi þúsunda þessa þrjá daga fyrir nákvæmlega ekki neitt.

Í janúar fór ég síðan til Dr. House og hann þurfti ekki annað en að hlusta mig.  Ég var send í gegnumlýsingu og síðan Scan og eftir þrjá daga var ég komin með besta skurðlækni og lungnalækni Tékklands og búið að ákveða dag fyrir uppskurð. Hér var ekkert verið að bíða eða sjá til það var bara gengið í málið.

Ég kvartaði við meinalækninn minn og ég fór í gær í Scan með bakið. Biðin tók tvo daga. 

Ég hef sagt nokkrum þessa sögu og þ.á.m. tveimur Íslenskum læknum og báðir hafa sagt mér að ég ætti að skrifa bréf bæði til Krabbameinsleitarstöðvarinnar og Hjartavernd.  Ég hef nú ekki látið vera að því en kem sjálfsagt til með að gera það við tækifæri.  Líka þar sem við erum alltaf að heyra sögur að heiman um gáleysislega meðferð á sjúklingum og hrikaleg læknamistök.

Það skal tekið fram að ég er ekki að áfellast alla læknastéttina í heild, þetta var vonandi bara einsdæmi með mig á tveimur leitarstöðvum Reykjavíkurborgar. 

Þetta var bara brot af því sem liggur mér á hjarta elskurnar.  En hálfnað verk þá hafið er.

Kem örugglega inná ýmislegt fleira þegar liggur vel á mér. 

Annars á ég bara svona ,,Obbsadeysí " dag í dag og þess vegna ætlum við að bregða okkur niðrí Sternberg á eftir og fylgjast með hátíðahöldum nornadagsins sem er í dag.  Nú fara þær á brokk allar sem ein og þess vegna eru kveiktir hér eldar um alla sveitir. 

Heyrði að veitt væru verðlaun ef maður kæmi í nornaroutfitti en þar sem ég er norn í eðli mínu þá þarf ég engan búning og fæ örugglega fyrstu verðlaun sem ég held að sé einn bjór.

Ætli ég geti bíttað og fengið rauðvín í staðin.  Sakar ekki að reyna.

 

 

Tónlistin varð allt í einu lifandi og ég sveif eins og í draumi. Já sæll!

Vitið þið hvað Ayurvedic Massage er?  Nei ekki það, ekki ég heldur fyrr en í gær þegar ég uppgötvaði þetta frábæra Indverska heilunarnudd.  Það var ekki amalegt að byrja sumarið á því að kynnast þessari meðferð.

Ég hafði verið að hugsa um að reyna eitthvað nýtt tll þess að koma orkuflæðinu í stand og reyna að koma mér út úr þessu aðgerðaleysi og aumingjaskap og hafði hugsað mér að reyna Reiki sem ég hafði heyrt um að væri gott fyrir sál og líkama.  Þess í stað var mér bent á Indverska meðferð þar sem notaðar eru þrennskonar olíur og þú liggur þarna eins og Skata í einn og hálfa klukkustund og lætur mjúkar hendur gæla við líkamann sem endar á sandmeðferð sem einnig er líka mjög þægileg. 

Þessi meðferð á að hjálpa líkamanum að endurnýja sig sjálfur en auðvitað með þinni hjálp, sem fellst í því að hugleiða og vera meðtækilegur og skemmir ekki að hafa trúna meðferðis.

Ég veit ekki hvað gerðist en ég fékk það á tilfinninguna að ég lægi í mjúkum grænum mosa og yfir mér hvolfdist iðjagrænt laufþak.  Tónlistin sem var framandi og kom úr litlum Ipod varð allt í einu lifandi og ég sá konu í hvítum kufli sem stóð ekki langt frá mér og söng þessa framandi söngva.  Seinna tók við á Ipodinum karlaraddir en þá fannst mér þær berast all langt frá úr einhverskonar húsagarði með gosbrunni í miðju og þar gengu þessi munkar um í rólegheitum og hummuðu fyrir mig. 

Alveg sama þið þurfið ekkiert að trúa mér en þetta var ótrúleg reynsla fyrir mig.

Í framhaldi varð ég svo heilluð af þessari meðferð að yfir teinu sem Camilla nuddarinn eða eigum við ekki heldur að kalla hana heilara drakk með mér, tek það fram að ég er ekki te fan, en þarna fannst mér það allt í einu gott,  þá pantaði ég Jóga tíma í næstu viku og nudd á eftir.  Aldrei komið nálægt Jóga en það var bara eitthvað sem sagði mér að þetta ætti eftir að hjálpa mér heilmikið og trúin flytur fjöll það vitum við.

Það var ekki amalegt að byrja sumarið svona vel.

SENDUM YKKUR ÖLLUM HLÝJAR SUMARKVEÐJUR HEIM Í YKKAR HÚS SEM BERAST VONANDI MEÐ SUNNANVINDUM HÉÐAN FRÁ STJÖRNUSTEINI.

 

 

Sko það er alveg lágmark að þetta sé í sétteringu.

- Heyrðu er það ekki Hortensíur sem þú hefur sett í kerin hér í gluggakisturnar?

Þetta var minn elskulegi sem tók svona til máls þegar hann var rétt kominn inn úr dyrunum hér í eftirmiðdaginn.  Hvað var minn núna að pæla hugsaði ég.

-Ha ja það fer nú bara eftir því hvað fæst og og stundum eftir því í hvaða stuði ég er í hvort ég vel Hortensíur eða eitthvað annað.  Af hverju spyrðu?

- Ég keypti nokkur blóm á leiðinni heim sagði hann og það var ekki laust við að það væri dálítill ánægjuhreimur í röddinni.  Þau eru þarna úti við bílskúrinn.

Ég var næstum farin að tuða yfir því að hann hefði nú átt að bíða þar til ég hefði getað farið með honum.  Þetta væri örugglega ekki nógu góðar plöntur og þar fram eftir götunum en stillti mig alveg eins og ég gat.  Andaði djúpt og taldi upp á hundrað.  Hugsaði um leið, hvað var hann nú að vesenast í þessu.  Þetta hefur alltaf verið mín deild og um leið og ég fór til að skoða innkaupin hugsaði ég :  ,,Andskotinn, hann hefur örugglega keypt einhverja vitleysu"

En viti menn voru þetta ekki bara hinar gerðalegustu plöntur og engin smá bunki sem lá þarna og æpti á mig:  ,,Setja mig niður, setja mig niður strax, ekki seinna en núna!!!!"

Ég fór í skítagallann og byrjaði strax að setja niður í ker þrátt fyrir hörð mótmæli frá mínum elskulega, hann ætlaði að gera þetta allt sjálfur þetta árið.  Ég hélt nú ekki en lofaði honum að bera í mig mold og koma kerjunum fyrir í gluggakistum á Stjörnusteini, Fákaskjóli og Leifsbúð.

Ég fór að velta því fyrir mér hvaða lit minn hefði keypt þar sem engin plantan var byrjuð að blómstra og ég sá ekki neitt um lit blóma á pottunum svo ég spurði:  Hvaða lit keyptirðu?

Ég hefði átt að sleppa þessari spurningu því það kom aðeins á minn en samt alltaf fljótur til svars:

  - - Lit?  Allt sami litur.

- Ertu viss, það stendur ekkert utan á pottunum.

- Já þetta var allt í sama rekkanum.

- Já það er nú ekkert að marka það sagði ég og var næstum farin að búa til mál.  Þið vitið, það er ekki hægt að hafa ljósbleikt, rautt og ferskjuliti saman í keri.  Það bara virkar ekki þannig. 

Svo nú er það stóra spurningin.  Hvaða litur verður á sumarblómunum í ár hér að Stjörnusteini.  Sko við erum að tala um hátt í áttatíu plöntur sem eiga eftir að blómstra hér í allt sumar og það verður að vera alla vega í smá setteringu.

Annars er ég bara nokkuð hress.  Fer í Hanastélsboð no. tvö í fyrramálið í boði Tékkneska ríkisins.

 

Gleðilega hátíð

Gleðilega páska

 

Þegar vorar fjörgast flest

fæst vart stund til náða

í hug mér ómar heima er best

og hvetur mig til dáða.

Bestu kveðjur til ykkar allra héðan frá Stjörnusteini.

Njótið dagsins við störf og leik hvar sem þið eruð stödd í heiminum.

Vorið komið og við búin að opna Listasetrið okkar fyrir Íslenska listamenn.

Fyrstu ábúendur Listasetursins okkar á vordögum eru nú komin hingað í Leifsbúð.  Fræðimaðurinn, Íslenskufræðingurinn og kennarinn Baldur Sigurðsson og kona hans Eva ætla að dvelja hér næstu sex vikurnar og vinna að verefnum sem ég kann nú ekki enn skil á en vonandi skýrist með tímanum.

Mikið finnst mér alltaf gott þegar líf færist yfir litla setrið okkar og ég get horft yfir frá Stjörnusteini að Leifsbúð og séð ljós kvikna á kvöldin eins líka þegar ég horfi yfir á morgnanna og fylgist með þegar ábúendur setjast með morgunkaffið sitt á litlu veröndina áður en byrjað er á dagsverkum. 

Ég er svo þakklát fyrir að hafa fengið tækifæri að koma upp þessu litla setri og getað deilt því með frábæru Íslensku listafólki nokkra mánuði á ári.  Setrið er lokað yfir háveturinn eða frá enda nóvember fram í mars. 

 Við förum að eins og farfuglarnir.  Opnum um leið og þeir þyrpast hingað úr suðri og syngja inn vorið með sínu dirrindí. 

Fyrir þá sem áhuga hafa á að skoða fleiri myndir af Leifsbúð þá er hér linkurinn

www.leifsbud.cz

 

    

 

 

Ljóð að morgni

Þetta ljóð kom til mín með póstinum í gær sent frá skólasystkinum mínum Kristjönu og Pétri Maack. Takk kæru vinir fyrir hlýjar kveðjur.

Langaði að deila þessu með ykkur þar sem mér fannst það eiga svo vel við núna á þessum fallega föstudagsmorgni. 

 

Ég vakna þennan morgun og vel að hann sé góður

vel að hann sé yndislegur, myrkur og hljóður

Ég vel að kúra um stund og staðnæmast við það 

hve stórkostlegt sé lífið ef fátt amar að.

 

Ég ákveð því að velja að vandamálin fá

vistuð séu hjá mér til þess eins að ljá

tilverunni ennþá fleiri tilbrigði og fleti

ég tek þeim opnum örmum svo nýtt mér þau ég geti.

 

Og eftir litla stund ég vel að fara á fætur

faðma þennan morgun og allar hans rætur

hita mér gott kaffi af kærleik þess ég nýt

kex smyr með osti í blöðin svo  ég lít.

Að endingu ég segi við þig sem þetta lest

þetta er góður dagur, hafðu það sem best.

Ég óska þess að hugsanir fallegar þig finni

ég faðmlag þér sendi og kveð þig að sinni.

Höf. ókunnugur

 

 

Fyrsta ,,hanastélið" mitt á spítalanum í boði Tékkneska ríkisins.

Í gær þar sem við Marta smarta sátum upp á spítala og biðum eftir að læknirinn kallaði mig inn, ó já m.a.o. hér er ég ekki að meina okkar Mörtu smörtu bloggvinkonu heldur mína Mörtu smörtu sem hefur þýtt allar læknaskýrslur fyrir mig og var svo sæt að koma með mér í gær í viðtalið hjá krabbameinslækninum svona til öryggis og þýða fyrir mig. Hún Marta mín er Tékknesk en gæti alveg verið Íslensk þar sem hún talar okkar tungumál betur heldur en sumir innfæddir.

Takk elsku Marta mín fyrir alla hjálpina og skemmtilegar umræður í gærmorgun.

Þar sem við sátum, gerðum að gamni okkar og flissuðu eins og smástelpur kom hjúkrunarkona að okkur og brosti alveg hringinn og sagði mikið er gaman að sjá hvað þið eruð hressar og getið skemmt ykkur, jæja eitthvað í þá áttina var það sem hún sagði.  Við brostum báðar og mér var litið yfir ganginn þar sem fólk sat og beið eftir að komast inn í chemo eða komast í viðtal.  Margir voru þarna í fylgd með sjúklingum en enginn sást brosa og hver sat í sínum heimi.  

Ég hugsaði eftir á, alltaf þarft þú að láta eins og fífl frú Ingibjörg, hvenær ætlarðu eiginlega að vaxa upp úr þessu kona!

Í bitið í morgun var lagt af stað í fyrsta hanastélið á spítalanum. 

 Fyrir ykkur, asnarnir ykkar sem vita ekki hvað hanastél er þá þýðir það kokteill en því miður löngu hætt að nota þetta orð yfir samkvæmi eins og cocktail pary.  Þetta hanastél sem ég var að fara í var í boði Tékkneska ríkisins ja eða næstum því.

Mér var nú ekki hlátur í huga í morgun þar sem við biðum eftir að vera kölluð inn á stofuna.  Ég sat prúð og stillt og sötraði vatn til að dreifa huganum.  Hafði ekkert að segja, ekkert að spyrja, ekkert að tala um.  Bara ein biðin í viðbót.

Loksins kom að mér og ég gekk keik inn á stofuna.  Þar blasti við mér fjögur rúm, fjórir svona hægindastólar og síðan voru nokkurn konar kollar, þó með baki við hvern rúmfótagafl.  Það var þröngt setinn bekkurinn, hver með sinn koktail drippandi inn í æðakerfið úr álklæddri platflösku.  Mér var sagt að setjast á einn kollinn. Þar sem ég sneri baki í glugga, rúm og næstum allt vistvænt inni í þessu herbergi var mér nauðugur einn kostur að horfa á gulmálaðan vegg og tvær hurðir sem ég vissi að ég hefði komið í gegn um.

 Þarna fyrir framan hurðina var lífið. Hér inni, þetta var biðsalur dauðans. Og mér varð allri lokið. Ég fór að gráta. Ekki mín vegna heldur vegna allra hinna sem voru með mér þarna inni. 

Þið sem hafið gengið í gegn um þetta skiljið hvað ég er að fara en þið hin, Guð gefi að þið þurfið aldrei að skilja þetta.

Þar sem ekki var búið að tengja mig við koktailinn minn bað ég um að fara fram og tala við minn elskulega sem tók mig í fangið og hughreysti.  Alltaf til staðar minn!  Eftir smá stund gáfum við hvort öðru five og ég þrammaði inn í þetta herbergi sem ég á nú eftir að heimsækja nokkuð oft næstu mánuði.

En nú kemur það skemmtilega við þetta allt saman.  Haldið ekki að minn eðalskrokkur hafi bara ekki næstum neitað að fá þennan fína koktail í æð.  Það var ekki fyrr en í þriðju tilraun sem tókst að troða þessu á sinn stað. 

 Ja hérna Sjaldan hef ég nú flotinu neitað sagði kerlinginog það hefur bara aldrei komið fyrir mig áður að neita koktail hehehhe....... hvað þá svona að fá þetta beint í æð! 

Sem sagt nú er ég komin heim þrælhress og útstungin.  Svo nú á ég frí í viku frá spítala og kærleikssystrum.